AQShda bolalar maʼlumotlarini toʻplagani uchun OpenAIʼga qarshi daʼvo berildi
Kompaniya voyaga yetmaganlarning shaxsiy maʼlumotlaridan modellarni oʻqitish uchun foydalanganlikda ayblanmoqda
San-Fransiskoda 12 va 16 yoshli ikki voyaga yetmagan nomidan OpenAIʼga qarshi jamoaviy daʼvo berildi. Daʼvogarlarning taʼkidlashicha, kompaniya oʻzining til modellarini oʻqitish va foydalanuvchilarning batafsil profillarini yaratish uchun bolalarning shaxsiy sirlar va sogʻligʻi haqidagi maʼlumotlarni ham noqonuniy ravishda toʻplagan.
Daʼvo arizasida OpenAI «bu maʼlumotlarni olishga haqqi yoʻq edi, ammo baribir shunday qildi», deyiladi. Kompaniya toʻplangan maʼlumotlardan boyitish uchun foydalangan, bu esa qonunni buzadi. OpenAI vakillari hozircha ayblovlarga izoh bermadi.
OpenAIʼdan foydalanish qoidalari 13 yoshdan kichik foydalanuvchilarning roʻyxatdan oʻtishini taqiqlasa-da, daʼvogarlar yoshni tekshirish choralari samarasiz ekanini aytmoqda. Bundan tashqari, bolalar xizmat koʻrsatish shartlaridagi yuridik jumlalarni tushuna olmaydi — sunʼiy intellekt xavfsizligi boʻyicha ekspertlar ham buni tan oladi.
Daʼvoda maʼlumotlari toʻplangan voyaga yetmaganlarga moliyaviy tovon puli toʻlash talab qilinmoqda. Advokatlardan biri Endi Liddellning aytishicha, agar OpenAI bolalar maʼlumotlaridan foydalangani uchun pul toʻlashiga toʻgʻri kelsa, bu xavfsizroq mahsulotlar yaratishga turtki berishi mumkin.
Daʼvogarlardan biri — 12 yoshli qiz — yil boshida ChatGPTʼda roʻyxatdan oʻtgan. U chatbotga yoshini aytganiga qaramay, chatbot u bilan shaxsiy mavzularda suhbatni davom ettirgan: hissiy kechinmalari, tanasi bilan bogʻliq komplekslari haqida gaplashgan va hatto tashqi koʻrinishini baholash uchun suratlarini yuborishni soʻragan. Chatbot uning ochiq gapirganini maqtib, uni «jasur» deb atagan.
«OpenAI bolalarni manipulyatsiya qilib, ularni eng sirli oʻy-fikrlari va suratlari bilan boʻlishishga majbur qilmoqda. Agar buni begona odam qilganida, jamoatchilikning gʻazabi qoʻzgʻalgan boʻlardi. OpenAI uchun esa bu shunchaki biznes», — dedi ish boʻyicha yetakchi advokat Pol Yetter.
