Nvidia Reflection AI startapini sotib olish boʻyicha muzokara olib bormoqda
Kompaniya ochiq ogʻirlikli modellar ishlab chiquvchi startapni toʻliq sotib olish yoki unga kiritiladigan investitsiyani oshirish variantlarini koʻrib chiqmoqda, deb yozadi Financial Times.
Nvidia Reflection AI bilan toʻliq sotib olish yoki qoʻshimcha investitsiyalarni oʻz ichiga olishi mumkin boʻlgan bitimni muhokama qilmoqda. Muzokaralar dastlabki bosqichda, yakuniy kelishuv esa litsenziyalarni sotib olishdan tortib, asosiy xodimlarni oʻziga ogʻdirib olishgacha boʻlgan turli shakllarni olishi mumkin. Groq bilan ilgari qoʻllangan shunga oʻxshash sxema sud jarayonlariga olib kelgan, bu esa Nvidia uchun huquqiy xatarlarni yuzaga keltirmoqda.
Reflection AI korporativ mijozlarga sunʼiy intellektni oʻz infratuzilmasida ishga tushirish imkonini beradigan ochiq ogʻirlikli modellarni ishlab chiqishga ixtisoslashgan. Bu xarajatlarni kamaytirib, maʼlumotlar sizib chiqishi xavfini minimallashtiradi.
Startap Nvidiaʼdan allaqachon 800 mln dollar jalb qilgan, uning kapitalizatsiyasi esa mart oyida 25 mlrd dollarga yetgan. Investorlar orasida hamkori Donald Trampning oʻgʻli — kichik Donald Tramp boʻlgan 1789 Capital jamgʻarmasi ham bor.
Tramp maʼmuriyati Xitoy ishlanmalariga muqobil sifatida AQShning ochiq ogʻirlikli modellarini rivojlantirishni qoʻllab-quvvatlamoqda. Nvidia asoschisi Jensen Huang avvalroq bunday modellar uchun milliy ekotizim yaratishga chaqirib, ularning innovatsiyalardagi rolini taʼkidlagan. Kompaniya sunʼiy intellekt loyihalariga, jumladan Hugging Face repozitoriysini 13 mlrd dollarga sotib olishga allaqachon oʻnlab milliard dollar sarflagan.
Reflection AI yaqinda Beam modelini taqdim etdi. Sinovlarda u samaradorlik boʻyicha Gʻarb analoglaridan ustun kelib, hisoblash resurslarini 3–4 baravar kam sarflaydi. Startap Pentagon va AQShning Janubiy Koreya kabi hamkorlari bilan hamkorlik qiladi. Har ikki kompaniya muzokaralarga izoh berishdan bosh tortdi.
Nvidia Reflection AI uchun qancha toʻlashga tayyorligini oshkor qilmayapti, biroq kompaniyaning qiziqishi oʻzining ilgʻor sunʼiy intellekt modellarining yetishmasligi bilan bogʻliq. Kompaniya sunʼiy intellekt chiplari uchun talabni ragʻbatlantirish maqsadida startaplarga faol sarmoya kiritmoqda. Hisoblash quvvatlari cheklangan sharoitda bu chiplar hanuz uning asosiy aktivi boʻlib qolmoqda.
