Avstraliya futbol ligasi futbol yulduzlari ishtirokidagi sunʼiy intellekt videolarini oʻchirishni talab qildi
Liga shunday videolar yaratgan Sportsbet kompaniyasiga murojaat qildi
Avstraliya futbol ligasi (AFL) oʻzining rasmiy hamkori Sportsbet kompaniyasidan futbolchilarning tasvirlaridan ularning roziligisiz sunʼiy intellekt kontentida foydalanishni toʻxtatishni talab qildi. Kompaniyaga sportchilar filmlar, seriallar va taniqli shaxslarning chiqishlaridan olingan replikalarni oʻqiyotgan videolarni oʻchirish topshirildi.
Videolarga yosh boʻyicha cheklov qoʻyilgan va ular ijtimoiy tarmoqlar orqali yangi mijozlarni jalb qilish uchun yaratilgan. Videolardan birida futbolchi Leychi Nil Gollivuddagi “Shuhrat xiyoboni”da yulduz bilan taqdirlanish marosimida reper Snupp Doggning nutqiga taqlid qilgani tasvirlangan. Boshqa videoda esa futbolchi Uill Eshkroft AFLning 2026-yilgi finalidagi oʻyin vaziyatiga javoban “Ozark” serialidagi iborani baqirib aytgan.
Sportsbet The Guardian nashri murojaat qilganidan keyin seshanba kuni videolarni Instagramʼdagi sahifasidan oʻchirdi. Kompaniya “Xotorn” jamoasi bosh murabbiyi Sem Mitchell va “Nort Melburn”ning sobiq murabbiyi Alaster Klarkson tasvirlaridan ham foydalangan.
AFL Futbolchilar uyushmasi (AFLPA) videolar liga hamkorlarining futbolchilar tasvirlaridan foydalanishini cheklovchi jamoaviy shartnomani buzayotganini bildirdi. Uyushma yuristi Aleks Taverner futbolchilar ishtirokidagi sunʼiy intellekt kontentidan ularning roziligisiz foydalanish taqiqlanganini taʼkidladi. AFL kontentni oʻchirish boʻyicha Sportsbet bilan hamkorlik qilishini tasdiqladi.
Sportsbet vakilining aytishicha, kompaniya muxlislarni koʻngil ochirish uchun kontent yaratadi va hamkorlarning fikr-mulohazalarini inobatga oladi. 2023–2027-yillarga moʻljallangan jamoaviy shartnoma ayrim cheklangan holatlarda futbolchilar tasvirlaridan ruxsatsiz foydalanishga imkon beradi, biroq unda sunʼiy intellekt haqida soʻz yuritilmagan.
Senator Devid Pokok bu vaziyat tartibga solishni kuchaytirish zarurligini koʻrsatayotganini aytdi. Federal hukumat sportchilarning qimor oʻyinlari reklamalarida paydo boʻlishini taqiqlovchi qonunni allaqachon qabul qilgan, biroq yangi qoidalar faqat kelasi yilda kuchga kiradi.