Rossiyada firibgarlar davlat organlari nomidan kompaniyalarga QR-kodlar yubormoqda
Rossiyaning F6 kompaniyasi hujjatlarning «maxsus yetkazib berilishi» uchun QR-kod orqali toʻlov qilishni talab qiluvchi fishing xatlarini aniqladi
Firibgarlar tarqatayotgan xatlarda oʻzlarini uchta federal idora vakili sifatida tanishtirib, «Nazorat boʻlimi» va «ИСХ_[idora nomi]» kabi iboralardan foydalanmoqda. Xatlarga ismlari va familiyalari oʻzgarib turadigan «katta inspektor» imzo qoʻygan.
Xatlarda rejadan tashqari tekshiruvlar yoki maʼmuriy javobgarlik haqida soʻz boradi. Tafsilotlarni QR-kod orqali toʻlov amalga oshirilgandan keyin olish taklif qilinadi. QR-kod soxta saytga olib boradi. Firibgarlar Yandex ishida uzilishlar boʻlishi mumkinligidan ogohlantirib, saytga oʻtish uchun Googleʼdan foydalanishni tavsiya qiladi.
Hujumdan koʻzlangan maqsad — «yetkazib berish» uchun 400 dan 600 rublgacha undirish, shuningdek, xodimlarning bank kartalari maʼlumotlari, F.I.Sh. va manzillarini yigʻish. Bu maʼlumotlardan keyingi kiberhujumlar uchun foydalanish mumkin.
Tarqatmalar ortida 2025 yil kuzidan beri faoliyat yuritayotgan QRGos TA nomli kiberjinoyatchi turibdi. U davlat organlarining rasmiy saytlariga taqlid qiluvchi domenlarni roʻyxatdan oʻtkazadi. 2026 yil boshidan hujumchilar internetdagi muammolar va Yandexʼdagi uzilishlar mavzusidan foydalanmoqda.
2026 yil sentyabr-oktyabr oylarida hujumlar besh soha kompaniyalariga taʼsir koʻrsatdi: sanoat, logistika, qurilish, chakana savdo va internet savdosi. Fishing saytlari .ru, .beer, .biz, .cam, .casa va boshqa domen zonalarida joylashtirilib, yetkazib berish xizmatlari dizaynini takrorlamoqda.
F6 shubhali xatlardagi QR-kodlar orqali havolalarga oʻtmaslik, xat joʻnatuvchilarining domenlarini tekshirish va maʼlumotlarni idoralarning rasmiy saytlari bilan solishtirishni tavsiya qiladi.