Toshkentdagi Astronomiya institutida Oʻzbekistonda ilm-fanni rivojlantirish istiqbollari haqida soʻz yuritildi
Respublika Fanlar akademiyasi talabalar, jurnalistlar va ekspertlar ishtirokida uchrashuv oʻtkazdi
Tadbir Butunjahon kosmik haftaligi doirasida oʻtkazildi. Uni Fanlar akademiyasi «Oʻzbekkosmos» agentligi bilan hamkorlikda tashkil etdi. Ishtirokchilar institut boʻylab ekskursiyada boʻlib, «Olam tasvirlari» fotokoʻrgazmasini tomosha qildilar. Unda osmon jismlarining suratlari hamda zamonaviy teleskoplardan foydalanib olib borilgan kuzatuvlar natijalari namoyish etildi.
Astronomiya instituti direktori, akademik Shuhrat Egamberdiyev Oʻzbekistonda astronomiyaning hozirgi holati va rivojlanish istiqbollari haqida maʼruza qildi. Muloqot davomida kosmik obyektlarni kuzatish natijalari va sohaning kelajagi muhokama qilindi. Ishtirokchilar bunday uchrashuvlar yoshlarni ilmiy tadqiqotlarga jalb etishda muhim ekanini taʼkidladilar.
Koʻrgazmada ekspertlar astronomik kuzatuv usullari haqida maʼlumot berdilar. Tadbir ilmiy hamjamiyat va jamoatchilik oʻrtasidagi aloqalarni mustahkamlash uchun maydonga aylandi.
