Renault kelajakning elektr minivenini namoyish etdi
E-Space konsepti qulaylik va modullilikka urgʻu berib, keng oilaviy avtomobillarni yana urfga qaytarmoqda
Renault 2026-yilgi Parij avtosalonida E-Space konseptini — «hayot uchun avtomobil» gʻoyasini yangicha talqin qiluvchi elektr minivenni taqdim etdi. Model 1984-yilda ishlab chiqarilgan ilk Espaceʼning zamonaviy davomi boʻlib, unda elektr mobilligi va yangi texnologiyalarga urgʻu berilgan.
E-Space Conceptʼning uzunligi 4,7 m, eni 2,02 m, balandligi esa 1,67 m. U anʼanaviy yoʻltanlamaslardan pastroq boʻlsa-da, panoramali oynalar tufayli keng salonni saqlab qolgan. Dizaynerlar Bauhaus meʼmorchiligidan ilhomlanib, oynalari past chiziqda joylashgan va koʻplab tabiiy yorugʻlikni oʻtkazadigan shisha tomli kabinani yaratgan.
Salon ichida aylantirish mumkin boʻlgan oltita alohida oʻrindiq bor. Ikkinchi va uchinchi qatorlar TGV poyezdidagidek «kvadrat» shaklini hosil qilishi mumkin, ikkinchi qator oʻrindiqlari yigʻilganda esa boshqaruv pulti oʻrnatilgan katta stol paydo boʻladi. Markaziy konsolga muzlatkich, havo tozalagich va hatto Connect 4 stol oʻyini oʻrnatilgan. Rul chambaragi ixcham boʻlib, mexanik ulanishdagi jismoniy cheklovlarni bartaraf etuvchi steer-by-wire texnologiyasidan foydalanadi.
Avtomobil OpenR Panorama egri displeyi, shuningdek, rul ortidagi tayanch atrofida aylanishi mumkin boʻlgan markaziy ekran bilan jihozlangan. Salon yoritishini sozlash mumkin: oʻqish uchun alohida chiroq va dinamiklarga oʻrnatilgan tungi yoritgichlar mavjud.
Renault E-Spaceʼni seriyali ishlab chiqarish rejalari haqida maʼlumot bermadi, biroq konsept elektr davrida oilaviy mobillikning yangi koʻrinishini belgilashini taʼkidladi. Model bozorda ustunlik qilayotgan yoʻltanlamaslar va sedanlarga muqobil boʻlib, kenglik va qulaylikka urgʻu beradi.
