Samsung Galaxy S27 narxini 70–100 dollarga oshirishni muhokama qilmoqda
Kompaniya flagman smartfonlarning boshlangʻich narxini dastlabki rejalarga nisbatan oshirishni koʻrib chiqmoqda, deb xabar beradi IT Chosun.
2027 yil boshida sotuvga chiqarilishi rejalashtirilgan Galaxy S27 flagmanlar seriyasining narxi hozircha yakuniy belgilanmagan. Yakuniy narxlar odatdagidek muayyan model va oʻrnatilgan xotira hajmiga qarab aniqlanadi, biroq qimmatlashish tendensiyasi joriy avlod qurilmalaridayoq namoyon boʻldi.
Janubiy Koreyada oktabrdan Galaxy S26 seriyasidagi qurilmalar narxi oʻzgaradi. Ushbu seriya dastlab oldingi avlodga qaraganda yuqoriroq narxlarda sotuvga chiqqan edi. Jumladan, 256 GB xotirali modifikatsiyalar narxi qariyb 105 dollarga (149 600 von) oshdi, 1 TB xotiraga ega Ultraʼning yuqori darajadagi versiyasi esa taxminan 195 dollarga (276 100 von) qimmatlashdi.
Bunday keskin oʻsishning asosiy sababi tezkor va flesh-xotira chiplari narxining sezilarli koʻtarilgani boʻldi. Natijada paradoksal vaziyat yuzaga keldi: Samsungʻning yarimoʻtkazgichlar boʻlinmasi foydasini oshirayotgan bir paytda, mobil yoʻnalish butlovchi qismlar uchun ortiqcha haq toʻlashga majbur boʻlmoqda. Meritz Securities tahliliy kompaniyasi hisob-kitoblariga koʻra, Mobile eXperience boʻlinmasi va tarmoq yoʻnalishining 2026 yil uchinchi choragi yakunidagi operatsion zarari 1,8 trln vonni tashkil etishi mumkin.
Moliyaviy xarajatlarni minimallashtirish va rentabellikni saqlab qolish uchun koreyalik gigant komponentlar siyosatini qayta koʻrib chiqmoqda. Kompaniya qimmat Qualcomm Snapdragon protsessorlariga qaramlikni sezilarli darajada kamaytirishni rejalashtirmoqda. Shu maqsadda Galaxy S27’ning bazaviy modelida, shuningdek Plus va Pro modifikatsiyalarida oʻzining Exynos 2700 chipidan kengroq foydalanishga qaytadi.
Bunga parallel ravishda Samsung hamkorlaridan toʻrtinchi chorakda ehtiyot qismlar yetkazib berish hajmini qariyb 30 foizga qisqartirishni soʻradi. Bu ombordagi zaxiralarni optimallashtirishga ham, ishlab chiqarish liniyalarini yangi modellarni yigʻishga tayyorlashga ham ishora qilmoqda.
