GitHub Copilot Fusionʼni taqdim etdi — xarajatning yarmiga Claude Code darajasiga deyarli teng

Copilot Fusion bir nechta modellar ishini muvofiqlashtiruvchi Project HydraFusion hamda ularni avtomatik tanlaydigan Copilot Auto Model Selection tizimlarini birlashtiradi. Foydalanuvchi tizim va saʼy-harakat darajasini belgilaydi, tizim esa muayyan soʻrov uchun qaysi modellarni ulash va ishni ular oʻrtasida qanday taqsimlash kerakligini aniqlaydi.

Artificial Analysis Coding Agent Index reytingida Copilot Fusion Max rejimi 60 ball oldi — bu Claude Codeʼning Opus 5.5 Max bilan qayd etgan natijasidan ikki balldan kamroq past. Bunda tizim qariyb ikki baravar kam token ishlatdi, vazifalarni taxminan 40 foiz tezroq bajardi va bir vazifa uchun API boʻyicha oʻrtacha xarajatning qariyb yarmiga tushdi.

Fusion vazifani bitta model yordamida hal qilishi, javobni tekshirishi va uni kuchliroq modelga topshirishi yoki dastlabki javobni tayyorlash, tekshirish va takomillashtirish jarayonlarini tashkil qilishi mumkin. Foydalanuvchi Fusion Standard, Fusion High yoki Fusion Max darajalaridan birini tanlaydi, administratorlar esa mavjud modellar va standart sozlamalarni boshqaradi. Toʻlov foydalanilgan har bir model uchun uning standart tarifi boʻyicha hisoblanadi; pullik rejalar uchun modellar qiymatiga hozircha 30 foizlik chegirma amal qiladi.