Swiftni qutqarib qolishning iloji boʻlmadi: NASA observatoriyasi orbitadagi qariyb 22 yillik faoliyatini yakunlamoqda
NASA eʼlon qilgan prognozga koʻra, apparat 4-noyabr kuni atmosferaga kirishi kerak. Observatoriyaning katta qismi yonib ketadi, biroq ayrim qismlari Yer yuzasiga yetib kelishi mumkin
NASAning Neil Gehrels Swift kosmik observatoriyasi orbitadagi faoliyatining yakuniga yaqinlashmoqda. 2004-yil noyabrida uchirilgan, massasi taxminan 1,45 tonna boʻlgan apparat 4-noyabr kuni Yer atmosferasiga kirishi kerak.
NASA 2-noyabr kuni eʼlon qilgan AQSh Kosmik kuchlari prognoziga koʻra, hodisaning hisoblangan vaqti Toshkent vaqti bilan taxminan 13:30. Biroq noaniqlik 11 soatni tashkil etadi, shu sababli bu vaqtni orbitadan tushishning aniq vaqti deb boʻlmaydi.
Konstruksiyaning katta qismi atmosferada yemirilib, yonib ketishi kerak. Ayrim qismlar omon qolishi mumkin. NASA Yer yuzidagi biror kishiga zarar yetkazish ehtimolini past deb baholamoqda. Parchalar tushishi mumkin boʻlgan hudud shimoliy 20,6° va janubiy 20,6° kengliklar oraligʻi bilan cheklangan — Oʻzbekiston bu hududdan tashqarida.
Swift orbitasi Quyosh faolligi fonida kuchaygan atmosferadagi tormozlanish sabab pasayib bordi. NASA Swift Boost missiyasi yordamida observatoriyaning ishlash muddatini uzaytirishga urindi: Katalyst Space kompaniyasining LINK apparati uni tutib, balandroq orbitaga koʻtarishi kerak edi. Biroq LINK yoʻnalishini boshqarishdagi muammolar bu koʻtarishni amalga oshirishga imkon bermadi.
Swift soʻnggi ilmiy kuzatuvlarini 20-oktabr kuni oʻtkazdi. Apparat taxminan 275 km balandlikkacha pasaygach, xavfsiz rejimga oʻtdi, jamoa esa atmosferaga kirishidan oldin uning ekspluatatsiyasini yakunladi.
Dastlab asosiy missiya atigi ikki yilga moʻljallangan edi. Yakunda Swift qariyb 22 yil faoliyat yuritib, gamma-chaqnashlar, oʻta yangi yulduzlar, qora tuynuklar faolligi, kometalar va boshqa obyektlarni kuzatdi. Uning qisqa muddatli hodisalarga tez burila olish qobiliyati boshqa observatoriyalarga kuzatuvlarga tezkorlik bilan qoʻshilishda yordam berdi.
