Asal, shoxli arilar va yangi mahluqlar: «The Witcher 3» mualliflari navbatdagi qoʻshimcha hududi haqida soʻzlab berdi
«Songs of the Past» qoʻshimchasida Geralt oʻz meʼmorchiligi, mahalliy anʼanalari va mahluqlariga ega yangi Letten hududiga yoʻl oladi. «The Witcher 3: Wild Hunt» uchun qoʻshimcha 2027 yilda chiqishga tayyorlanmoqda
CD Projekt RED ishlab chiquvchilari «Songs of the Past» syujet qoʻshimchasi uchun Letten hududini yaratish haqida soʻzlab berdi. Habr nashri Lucca Comics & Games festivalida IGN bilan oʻtkazilgan intervyuga tayanib xabar berishicha, tafsilotlarni darajalar dizayneri Maylz Tost va ssenariynavis Paula Meysner taqdim etgan.
Mualliflar yangi hududga togʻli Skellige va botqoqli Velen hududlaridan ajralib turadigan, oʻziga xos qiyofa berishni xohlaydi. Letten meʼmorchiligida britaniyalik aristokratik motivlar Polsha qishloq joylariga xos unsurlar bilan uygʻunlashadi.
Bu yerdagi kundalik hayot tafsilotlari atrof-muhit va topshiriqlar bilan bogʻlangan. Masalan, mahalliy breket ichimligi — asal va pivoning aralashmasi — asalarixonalar tashkil etish va xmel yetishtirish zarur boʻlgan hudud xoʻjaligiga taʼsir koʻrsatgan. Asal yangi mahluq Svarmion bilan ham bogʻliq: u bu shirinlikni yaxshi koʻradi va oʻzini himoya qilish uchun shoxli arilardan foydalanadi.
Ishlab chiquvchilar asl manba bilan ishlash jarayoni haqida ham alohida soʻzlab berdi. Ssenariynavislar yangi hikoyalar Andjey Sapkovskiy yaratgan olamni tabiiy ravishda toʻldirishini taʼminlash uchun kitoblar va oʻyinlar boʻyicha mutaxassislar jamoasi bilan maslahatlashadi.
«Songs of the Past» Foolʼs Theory bilan hamkorlikda yaratilmoqda. Reliz 2027 yilga rejalashtirilgan, aniq sana esa hozircha eʼlon qilinmagan.
