Raqobatchi SpaceXʼning mobil aloqa bozoriga chiqishini kamida 200 mlrd dollarga baholadi
Deutsche Telekom rahbari Tim Höttges yirik Starlink Mobile operatorini tashkil etish chastotalar va yer usti tarmogʻiga katta mablagʻ kiritishni talab qilishini aytdi. Shu bilan birga, u Ilon Maskning rejalarini soha uchun jiddiy tahdid deb atadi
T-Mobile kompaniyasining bosh kompaniyasi boʻlgan Deutsche Telekom bosh direktori SpaceXʼning AQShda yirik mobil operator tashkil etishi mumkin boʻlgan xarajatlarini kamida 200 mlrd dollarga baholadi. Bu haqda The Verge uning moliyaviy natijalar muhokamasi chogʻidagi chiqishiga tayanib xabar berdi.
Tim Höttgesning soʻzlariga koʻra, SpaceX 76 MGts chastota spektrini sotib olgan, T-Mobile esa taxminan 400 MGts chastotaga ega. Uning fikricha, chastota resurslarini kengaytirish yuzlab milliard dollar miqdorida mablagʻ talab qiladi. Bundan tashqari, qurilmalarga ketadigan xarajatlardan tashqari, aloqa minoralari infratuzilmasidan foydalanish uchun yana 20–30 mlrd dollar kerak boʻlishi mumkin.
Tilga olingan 200 mlrd dollar SpaceX eʼlon qilgan budjet emas, balki raqobatchi kompaniya rahbarining bahosidir.
Starlink Mobile smartfonlar bilan toʻgʻridan-toʻgʻri aloqa qiluvchi yoʻldoshlarni yer usti mobil tarmogʻi bilan birlashtirishni rejalashtirmoqda. Shu hafta Qualcomm SpaceX bilan uning infratuzilmasini yaratish boʻyicha hamkorlik qilayotganini maʼlum qildi.
Xarajatlarga nisbatan shubhalariga qaramay, Höttges loyihaga jiddiy qarashini taʼkidladi. Uning fikricha, yoʻldoshlar, sunʼiy intellekt va raqamli xizmatlarning uygʻunligi SpaceXʼga yangi aloqa formatini taklif qilish imkonini berishi mumkin.
